terça-feira, 6 de junho de 2017

Xeira románica por Cenlle este domingo 11 de xuño

O vindeiro domingo 11 de xuño iremos a Cenlle a ver románico!!!!!

Tiñamos fame dese románico humilde, fermoso, misterioso, descoñecido e Clodio González vainos levar a coñecer as igrexiñas do seu Cenlle natal.

Recoñezámolo... se non fosemos da súa man quen podería imaxinar que pisariamos San Miguel do Osmo, Santa Baia de Laias, Santa Mariña de Esposende, Santiago de Trasariz, Santa María de Razamonde ou San Xoán de Sadurnín?

Aí se agocha o románico dos nosos corazóns, ese románico humilde que non sairá nos documentais de Canal Arte pero que nós imos ter o privilexio de coñecer.




Qué nos ofrece Cenlle preguntámoslle a Clodio e dixo el: viñedos, igrexas, capelas, cruceiros, pazos, construcións tradicionais e extraordinarias vistas panorámicas dos vales do Miño e do Avia. Que Clodio non nos agochará ningunha pequena xoia do seu Cenlle  non nos cabe dúbida.


Quedamos para vernos ás 10.30h na praza da Tenencia de Cenlle. O xantar farémolo no restaurante do Balneario de Laias -en modalide buffet libre- e que ninguén quede nada casa coa excusa de que non sabe onde está Cenlle, por onde se vai ou por onde se vén. Tamén Clodio pensou niso e fíxonos este mapa de aproximación.
E que hai que facer para asistir?
Enviar un correo a osorrisodedaniel@gmail.com antes do venres ao mediodía dicindo o número de persoas que asistirán, os nomes de cada asistente e se non vos molesta compartir coche dende onde vides porque se podemos trataremos de xuntar xente en coches para que non pensen en Cenlle que somos unha concentración automovilística senón un grupo de amigos namorados do seu patrimonio.
O prezo da xeira -incluíndo o xantar no balneario de Laias- é de 18 euros.
Vémonos en Cenlle, Sorrisos!
E se alguén pregunta quen é Clodio... Clodio é o cronista oficial de Cenlle e moito máis. Tanto que desborda a wikipedia coa súa obra! https://gl.wikipedia.org/wiki/Clodio_González_Pérez

quarta-feira, 4 de janeiro de 2017

Un sorriso para cada día do ano. Almanaque 2017

Un ano máis Sole Felloza colleu a cámara e percorreu os camiños da Ribeira Sacra. Pensando en quen? Pensando en ti.

Pensando en traerche 14 imaxes que che levanten un sorriso.

Este ano Sole andou as estradas dos concellos de Portomarín e Paradela, na beira norte da Ribeira Sacra.

 E non contenta con velo románico a pé tamén o quixo ver dende o aire e levou un dron.

E onde se pode mercar?
En Santiago de Compostela no Kiosko Ártica da Rúa do Vilar, na libraría Couceiro da Praza de Cervantes, na xabonería Maravalla da rúa das Orfas.
Na Coruña na Libraría Couceiro da Praza do Libro.
En Vigo na Libraría Libro's, na rúa San Salvador nº2, na Libraría Lafer, nas galerías da rúa Urzáiz nº184, na Libraría Cartabón, na rúa Urzáiz nº125, na Libraría Andel, na rúa Camelias nº102, na Libraría Librouro, na rúa Eduardo Iglesias nº12, na Libraría Versus, na rúa Venezuela nº80
En Ourense  na librería Queixumes, na libraría Platero e na Libraría Padre Feijóo.
En Chantada na Libraría Central.
En Monforte de Lemos na Libraría Agrasar e no Centro do viño.
En Lugo en La voz de la verdad, Biblos e Trama.

Para os que vivides fóra de Galicia xa sabedes que volos enviamos por correo alí onde estes.  Solicitádeo escribindo a osorrisodedaniel@gmail.com






segunda-feira, 8 de fevereiro de 2016

Xeira dos namorados do románico

O vindeiro 14 de febreiro temos unha cita románica e apaixoada. Nin Venezia, nin París, nin unha cea romántica: unha xeira polas terras de Melón e Carballeda de Avia.

A cousa vai así. Só tendes que erguervos superrománicos e supernamorados do noso patrimonio.
Ás 11h quedamos diante do mosteiro de Melón (Ourense). Xa sabedes, se queredes tomar un café, teredes que tomalo ás 10.45h.

Pasaremos a mañá descubrindo a súa historia, a súa arquitectura, os problemas que presenta a súa conservación.
Xantaremos ás 13.30h en Quins no restaurante O Casal e sairemos correndo cara Carballeda de Avia para ver o Santuario de Lodairo.
De alí a Abelenda das Penas
E se somos bos e boas e non demoramos máis do necesario nin nos perdemos polas corredoiras e aínda chegaremos a tempo de visitar tamén Muimenta.
Prezo: 20€ persoa.
Data límite para se anotar: xoves 11 de febreiro.
Prazas limitadas (o local do xantar ten moi limitado o aforo). Por rigoroso orde de aviso.
Para anotarse cómpre mandar un correo a osorrisodedaniel@gmail.com cos nomes completos, tfnos e lugar de procedencia dos participantes.

Hoxe é luns, mañá é martes
cuarta feira logo vén,
moito me tarda o domingo
por ver a quen quero ben.


segunda-feira, 4 de janeiro de 2016

Carta dos Reis Magos de Iria Flavia ao Sorriso de Daniel



 
Afastado Oriente, xaneiro de 2016
Queridos Sorrisos de Daniel:

Queriámosvos avisar con tempo para que pola noite non nos deixedes vaso de leite con bica para nós e mazarocas de millo para os nosos camelos como tiñades por costume. Non agardedes porque non imos parar.

Levamos varios anos atendendo as vosas cartas con verdadeiro pracer pero a verdade este ano 2016 fóisevos a man por completo. Estamos afeitos a tratar con rapazada que pide a lista completa do catálogo de Toys-R-Us pero, criaturas!, unha carta de 127 páxinas de peticións relacionadas co patrimonio románico galego nos vos parecen moitas páxinas? Vale que estamos en ano electoral pero isto desborda a un séquito celestial e austero coma o noso.

Para que non vos cheguen os morros ata o Valedor do Pobo imos facer repaso do que vos fomos adiantando ao longo do ano.

·         Apertura das ábsidas de Santo Estevo de Ribas de Sil: conseguido.

·         Condena en firme e inapelable das obras executadas na contorna do mosteiro de Melón, obrigando á súa demolición: conseguido.

·         Xeira polas terras do Arnoia cos amigos de Xeitura: conseguido.

·     Simposyum Viño e Románico cos amigos da Fundación Vicente Risco, visitando Xagoaza en Valdeorras, San Paio de Abeleda na Ribeira Sacra, San Clodio no Ribeiro e  o Castelo de Monterrei cos seus respectivos catro concertos: conseguido.

·         Xornada de mantemento e limpeza en San Paio de Abeleda: conseguido.

·         Publicación nun libro de texto da ESO das vosas iniciativas: conseguido.

·         Difusión en diferentes xornais, radios e televisións das vosas comunicacións: conseguido.

·         Divulgación do documental A memoria de Abeleda de Iria Puga: algo avanzastes.

·         Remate das obras en San Paio de Diomondi: conseguido.

·         Publicación dun novo calendario románico con fotografías de Sole Felloza nas terras de Chantada e Taboada: conseguido.

·         Xeira polas igrexas de Pesqueiras, San Salvador de Asma –apoiando a petición da súa declaración de BIC- e Castelo –lembrando a D. Xaime Delgado-: conseguido.

Ídesnos vir co conto de que en xullo vos reunistes cos altos mandos da Consellería de Cultura e que a entrevista foi un desastre. Diredes que lles pedistes un Catálogo en rede dos bens inventariados e que vos dixeron que non, que lles pedistes unha Inspección Técnica periódica do patrimonio e que vos dixeron que non, que lles pedistes que actuasen en San Paio de Abeleda e que vos dixeron que non. E tamén diredes que vos contestaron cun “por un lado xa ves e polo outro que queres que che diga” á vosa petición dunha  resposta máis firme nos ataques ao patrimonio -como o perpetrado en Melón-, ou a un Plan para ter accesibles e visitables os edificios románicos, ou mesmo á publicación dos días e horarios de apertura dos BIC na web da Consellería.

Xa nos gustaría poder axudarvos con iso pero coa lexislación divina como está nós o único que podemos facer é deixarlles carbón e seguramente non leven gran desgusto. Estes sonvos máis de Papá Noël. A nós tamén nos gustaría que a estrela de Belén viñese con navegador e GPS e tivemos que amañarnos co que había. Iso si, o próximo ano non sexades paspáns e non lle volvades mandar unha botella de viño ao Conselleiro pola festa do San Paio, por moito que na etiqueta leve as ruínas do mosteiro debuxadas, que non o sabe apreciar, monas! Ou deuvos as grazas?

Animámosvos a que sigades como ata agora e o ano que vén escribídenos unha carta como é debido: unha folla por unha cara e con letra grande que a presbicia non perdoa.

 Melchor, Gaspar e Baltasar.

sábado, 5 de dezembro de 2015

Xeira do Románico de Chantada e Taboada

Estás convidado, estás convidada

Cando?
O vindeiro domingo 13 de decembro ás 10.30h sairemos de diante do Restaurante Mogay de Chantada. Ollo sairemos ás 10.30h, co cal se queres tomar un café ven con tempo....

Qué visitaremos?

Santa María de Pesqueiras, entre castiñeiros e vides que baixan caro o Miño e co seu interior de pinturas renacentistas.

San Salvador de Asma, cos seus restos prerromanicos, a súa ábsida románica, o seu interior sorprendente e aquelas cousas incógnitas que te sorprenderán...


Santa María de Castelo, coa súa árbore de Xesé, cos seus capiteis e co seu arco toral, as súas pías bautismais...


Qué faremos ademais de visitar as igrexas?
 En Pesqueiras presentaremos o Almanaque Románico do 2016 unha magnífica oportunidade para mercar os exemplares que queirades para agasallalos no nadal, para traficar con eles na revenda..

En San Salvador de Asma coñeceremos por parte dos promotores a proposta de declaración de BIC do edificio.

E en Santa María de Castelo recordaremos a figura de D. Xaime Delgado a quen tanto lle debemos polo estudos do románico que deixou e sobre todo polo coidado que puxo en conservar tantos e tantos edificios románicos.

E canto me custará?
20€ que inclúen o xantar no Restaurante Os Pendellos e mais un exemplar do calendario románico.

E como fago para me anotar?
Escribe canto antes un correo a osorrisodedaniel@gmail.com cos nomes das persoas que veñades e deixando ademais un teléfono de contacto. Faino axiña porque o número de asistentes é limitado.

Ata o domingo 13 de decembro!

sábado, 22 de agosto de 2015

Para apagar a sede de románico

É verán. Vai calor e temos sede de románico.

A Fundación Vicente Risco e O Sorriso de Daniel teñen o pracer convidarvos a beber no traballo dos mestres canteiros do medievo galego. O románico de Valdeorras, o románico da Ribeira Sacra, o románico do Ribeiro e o románico de Monterrei.
Podedes anotarvos a todas, a unha, ás que queirades...

Xa sabedes, non deixedes para o final que as prazas son limitadas.





Modalidades para anotarse:
1. Á totalidade das actividades. Custo 150€ para non asociados e 110€ para asociados.
2. A unha das xornadas: 40€ para non asociados e 30€ para asociados.

Ingreso do pagamento en ES71 20805273 8630 4004 7616
Comunicación do ingreso a secretaria@fundacionvicenterisco.com ou osorrisodedaniel@gmail.com
(agradécese que figuren nomes de cada asistente e tfno de contacto).